يانا يالفوضى

مازلت أتذكر هذا الخطاب جيدا , الخطاب اللى ظهر فيه المخلوع على التليفزيون وخيرنا بين استبداده او الفوضى , كانت رسالته واضحة جدا , مش عارف ازاى محدش خدها فى اﻻعتبار وكل الناس بعدها نسيت او تناست ووجهت وابل غضبها عالثورة والثوار , لسه فاكر يوم 11 فبراير يوم التنحى , اما عمر سليمان طلع وذاع البيان , يومها فرحت آه هيصت آه لكن كان جوايا شك وتساؤل يمنعنى من الفرحة الكاملة , مكنش شك كان تعجب وتساؤل ازاى حسنى مبارك يسيب السلطة بالسهولة دى .

فعلا كنت مندهش حسنى مبارك أذكى رئيس مستبد وظالم فى المنطقة كان أكثر واحد اتوقع انه يقتل شعبه اكتر و اكتر ازاى استسلم , سالت نفسى السؤال ده يوم تنحيه لكنى نسيت او تناسيت , المجلس العسكرى فى اول الثورة كان حمامة سلام , بيانات بتسليم السلطة وقبل اغسطس وبدأت السقطات , اول سقطة عملها المجلس ومحدش خد باله منها او كلنا خدنا لكننا وللاسف كنا اغبياء كان اﻻستفتاء , انت بتعمل استفتاء بصفة ايه؟ لكن للاسف حصل واﻻستفتاء اتعمل , وكان اول مسمار فى نعش الثورة كما يتخيلون اﻻن اخواننا فى " طرة " ونجحت اول خطوة .

يوم 9 مارس تحديدا كشف لنا المجلس عن جزء من وجهه القبيح ساعة ما فض اعتصام التحرير بالقوة وقام ضباط الجيش المصرى الحر بكشف عذرية بنات مصر الاحرار اللى جزمتهم اغلى من رقبة اى كلب اتكلم عليهم كلمة , ساعتها عضو من اعضاء المجلس طلع وقال انفلات فى اﻻعصاب من الضباط ومعلش ياخواننا واصل دول ملهمش فى الحياة المدنية .

صراحة مش عارف ليه انا دونا عن الناس , يمكن انا مثلا ذكى او حاجة , بس مبلعتش مبرر ان ضباطنا ملهمش فى الحياة المدنية والتعامل مع المدنيين , مش فاهم هل ضابط الجيش ده مش انسان عايش فى وسط اهله ابوه وامه ومراته وعياله , وﻻ هو من ساعة ما دخل الجيش وهو اترهبن وساب العيشة , طبعا لا بالعكس ضابط الجيش وتحديدا رجالتنا اللى فى الشرطة العسكرية هنا فى القاهرة متظبطين ورحلات وشاليهات وديسكوهات والحياة زبادى خلاط بس بييجوا عند المدنيين اللى فى التحرير وبينسوا المدنية , وكم من مدافع عنهم كنت بقابله ونفس النغمة بتتقال لدرجة انى حسيت انى غلط وان ضباطنا دول ملايكة نازلة من السما بجناحات ومعاهم سهم كيوبيد .

وعدى موضوع العذرية ولم يتم التحقيق فيه مع ان سيادة اللواء " كائد التورتة العسكرية " قال انه هيتم التحقيق , طبعا انسى ياعمرو تحقيق مين وخره مين " لامؤاخذة " , قلنا خلاص سماح النوبادى , يقوم ياخويا انام واصحى على فرم ملفات امن الدولة , وساعتها قلت الجهاز ده كان لازم يتفور وساعتها لاقيت معارضة كبيرة من صحابى , كله كان فى نفس واحد او يمكن مش كله معظمه قالى طبعا لا وغلط , كان ليهم اسبابهم بس انا كمان كان عندى اسبابى وبرضه مر الموضوع مرور الكرام او مرور العجوزة مش هتفرق المهم عدى وخلاص .

يوم 8 أبريل قامت قواتنا المسلحة وتحديدا الصاعقة المصرية وقوات فرقة 777 بنزول ميدان التحرير وفض الاعتصام بتشكيلات اشبه بمعركة حربية بمعنى الكلمة وتم احتجاز ضباط الجيش المصرى (( الشرفاء )) وطبعا كل او معظم الناش قالت دول خونة ووﻻد كلب و تيييييييييت , مع انى مش شايف انك لو اعترضت تبقى خاين , انا افهم ان الخيانة هى بيع اسرار تجسس لكن اقول رايى ابقى خاين ؟؟ .. ومع ذلك يا سيدى سكت ومتكلمتش والحوار اتنسى والرجالة فى السجن الحربى بيتعذبوا .

كل اللى فات ده كان بيحصل ومحدش كان بيفكر فى اى حاجة , والناس بدات تدخل فى مهاترات صانعها اﻻول هو المجلس العسكرى وباينه وواضحة وضوح الشمس , لكن دايما احنا بنحب نشوف البعيد وندور فى مكان تانى مع ان اللى بندور عليه تحت رجلنا , اللى بندور عليه انا حطيته فى اول كلامى , لكنى لم اكن اتخيل ان اﻻعلام العاهر القذر يقول (( فلقتونا بالفلول والنظام السابق هو كل اما حاجة تحصل تقولوا فلول )) ساعتها فهمت الدنيا فيها إيييييييييه ,, محدش يقولى بوظو وكاراتيه هزعل بجد مش طالبة قلش .

استفتاء وانشاء احزاب وتخوين ناس لناس تانيين و ده يقول لده انت عميل والتانى يقوله لا انت ماسونى , كنت سعيد جدا ان الشعب المصرى ثقافته زادت لدرجة انه اتكلم عن الماسونية , لكن اتضحلى انه يعرفها عن طريق (( لورين وهاردى الاعلام المصرى = توفيق عكاشة واحمد إزبايضر )) طبعا ساعتها أدركت طبيعة المعلومات اللى وصلت للشعب عن الماسونية , عرفت انى لو قلت لواحد ايه هى الماسونية دى هيقولى (( الماسونية دى تبقى خالتك )) بس ياعم وغير أحمد إزبايضر وتوفيق عكاشة , كان عندنا مدحت شلبى (( شلبوكة وشالابينو وشلابينهو زى ما بيقولوا فى الماسدجات )) وهاتك يا تطبيل , تخيلوا اما مدحت شلبى يكون من سنة بيقول ان حبيب العادلى ده أحسن وزير داخلية وان اسماعيل الشاعر ده أكفا وده خليفة العادلى وبعد الثورة يقول مجرمين وفى طرة .

تخيلوا احمد شوبير مع مجدى الجلاد بيعترف بلسانه على التزوير وبعدها يقول انتوا بتحكموا ازاى وهما فى ايد القضاء والقضاء يقول كلمته , وفجاة مدحت شلبى وشوبير ومصطفى يونس وكل من هب ودب بقى يتكلم فى السياسة , المزور أحمد شوبير بيتكلم فى السياسة نسى أما كان بيهتف لجمال مبارك اما كان بيطبل , نسى مكالمته مع البت الصحفية ونسى اما مرتضى منصور قاله هقعدك فى البيت بالبيجامة وهاتك يا مداخلات وهاتك يا سب فى الثوار .

والحق يقال ثوارنا او من يتحدث ويظهر فى اﻻعلام منهم غير جدير بالظهور وغير جدير بالكلام وكانوا سبب من اسباب تشويه منظر الثوار ادام الراى العام , وكانوا سلاح فى ايدين متصيدى الاخطاء لتشويه الثورة , والحق يقال انى لا الوم عليهم ولكنى الوم على اﻻعلام اللى كان بيختار من يتكلم عن الثورة , وهكذا بدا مسلسل تشويه الثورة والثوار واصبحنا بلطجية التحرير , وطبعا ده بيزود الطين بلة على راى العقيد معمر القذافى , تخيلوا انا مهندس او طبيب بنزل التحرير وفى اى نقاش اﻻقى واحد بيقول دول بلطجية لازم هتعصب واثور .

وجه مايو وحصلت أحداث السفارة اﻻسرائيلية يوم 27 مايو وبعدين أحداث مسرح البالون فى يونيو وكل شوية أسمع كلمتين (( طرف ثالث + قلة مندسة )) ﻻ القلة المندسة عارفين نخرجها من وسطنا ولا الطرف الثالث عارفين نكتشفه مع اننا كلنا حلينا حلقات المفتش كرومبو حلقة حلقة , بلد فيها جهاز أمن وطنى (( امن دولة بعد الضهر )) ومخابرات عامة ومخابرات حربية وجهاز مباحث جنائية يعد من أكفا اﻻجهزة فى العالم (( على حد ادعائهم )) وبالرغم من كل هذا ظل الهجوم على الثوار والثورة والتشويه مستمر .

ثم جاءت موقعة العباسية يوميها بس بدات اشك فى اﻻمل اللى كان مالينى من بعد الثورة , بدأت أدرك اننا داخلين على مرحلة زفت , فى اﻻول المجلس كان بيتهم طرف تالت لكن دلوقتى الطرفين باينيين وواضحين الشعب مع نفسه أهالى العباسية مع الثوار , طبعا انا معرفش ازاى قالوا أهالى العباسية فى الوقت اللى كل اصحابى فى العباسية ميعرفوش اى حاجة عن اللى حصل , بس ما علينا اللواء (( كائد التورتة العسكرية )) قال اهالى العباسية , بعدها الناس بدات تصب كل غضبها على الثوار , كنت أطلع الميكروباص من دول أتحاشى الدخول فى نقاش عن الثورة لانى هلاقى ناس بتدافع وبتتهم وبتبرر من غير دليل لمجرد انهم مغيبين ومش عاوزين يفهموا .

ثم يأتى المجلس العسكرى فى أول أيام شهر رمضان الكريم , الشهر اللى الناس بتستناه عشان الرحمة وربنا بيسلسل فيه الشياطين , لكن شياطين اﻻرض كانوا قاعدين واتفض اعتصام الثوار , والمشكلة انها حبكت اوى اوى مع (( كائد التورتة العسكرية )) انه يفض الاعتصام والناس بتفطر !!! , طب ياسيدى استنى اما يحلو ويتفرجوا عالفوازير ومشيهم , لكنه لم يحدث وبدل مالناس تقول ليه الاذى فى اول يوم رمضان ونتعاطف مع معتصمين التحرير طلعوا يشتموا فيهم , ومر الموضوع مرور الكرام , والشهداء يسقطون والحوادث تتزايد , واﻻنفلات اﻻمنى شغال .

ومش فاهم يعنى ايه ضباط الشرطة حاسين بالانكسار , يعنى ايه ؟!! , هو ضابط الشرطة اما دخل كلية الشرطة كان فاكر إيه كان معتقد ايه يعنى ايه منكسر , المفروض نعمله ايه نروح نستسمحه نروح نبوس ط... إيده مثلا , نغنيله ؟؟؟ ... وفى خضم هذا الزخم من اﻻحداث كانت محاكمات الرئيس السابق وصبيانه وعياله , حاجة آخر ألاجا ترينجات لاكوست وبوما واديداس تحس ان فريق ريال مدريد جاى يلعب مش مساجين , وتاجيل ورا تاجيل .

وكل يوم يعدى يبقى اسود من اللى قبله , الى ان جاءت (( مذبحة ماسبيرو )) وطبعا كلنا عارفين مييييييييين عملها هاااا يلا مين هيجاوب ؟؟؟؟ ... شاطر يا حسييييييييين الاجابة هى (( بسم الله الرحمن الرحيم اﻻجابة تونس )) .. غلط يا حسين اترزع اقعد ,, ايوه انت جاوب (( بسم الله الرحمن الرحيم اﻻجابة قلة مندسة وطرف ثالث )) برافووووووووووووووووووووووووووو ,, بس برضه غلط الاجابة هى (( اﻻصابع الخفية )) , ايوه اصابع وخفية مندهشين ليه , التليفزيون المصرى قال كده , التليفزيون المصرى النقى الطاهر فى عز مالمصريين بيتداسوا بالمدرعات , المذيعة بتحرض الناس عالنزول للحرب وحماية ماسبيرو .

قتلى مجهولى الهوية من التشويه والدهس ومع ذلك معرفتش التحقيقات رسيت على ايه ومين متهم ومين جانى ومين اللى كل الجبنة , بس ياسيدى وقامت معيطة , وتقوم جاية شرطتنا المحترمة وجيشنا اللذوذ الحبوب يفض اعتصام 200 نفر جوه الصينية وتبدأ أحداث محمد محمود ونبدا فى اكتشاف طريقة جديدة لدفن موتانا وشهداءنا , اﻻ وهى القاؤهم فى الزبالة وغاز مسمم واسلحة كيماوية ويتساقط الشهداء ويتساقط الشباب كاوراق الشجر , شباب طاهر دكاترة ومهندسين ومحاميين (( بلطجية )) بيتقتل فى التحرير وبعد 8 ايام من اﻻحداث جاءت الفكرة الجهنمية اﻻ وهى سد الطريق واقامة حاجز بين الثوار والشرطة بعد فيديو (( جدع يباشا )) ويذهب اﻻعتصام الى مجلس الوزراء .

وتبدا أحداث مجلس الوزراء والحقيقة انا لايم عالثوار , ازاى يعنى نظلم العساكر اللى كانوا بينضفوا مجلس الوزراء ونقول انهم كانوا بيرموه علينا ... هما كانوا بيرموه فى الشارع احنا اللى اغبياء ونمنا فى الشارع , ويستشهد (( الطاهر )) عماد عفت ويحرقوا المجمع العلمى والثوار ينقذوا الكتب , لكن يأبى تليفزيوننا المصرى ان يقدم الحقيقة , ويظهر الثوار من انقذ الكتب على انهم من احرقوها (( احاااااااااااااااااااااا )) اسف يا جماعة بس انا ماسك نفسى من بدرى بقالى سنة ومع ذلك فتحت التحقيقات وكالعادة لم يستدل له على عنوان هذا التحقيق .

امبارح اﻻخوان والثوار دبوا فى بعض وكانت الفتنة على وشط الاشتعال لولا فضل الله , النهارده بقى ماتش اﻻهلى والمصرى اتقتل 70 وفقا للتليفزيون المصرى (( اعرف ووووووششش انك لازم تضرب الرقم ده فى 4 )) هيطلعلك الرقم الحقيقى , كل من كان فى الاستاد أجمع على انها مدبرة وكل اﻻدلة والبراهين بتقول كده , وﻻول مرة فى التاريخ اقعد فى ميكروباص والناس تتفق معايا فى الراى ان الفاعل هوووو ...................... ,, ها هو ميييييييييين لسه متعرفوش , أفيقوا يرحمكم الله أفيقوا فهم ثعالب وذئاب كما قال أبو اسماعيل وتذكروا هذه الجملة (( هناك خيط رفيع يفصل بين الحرية والفوضى = كلمة حسنى فوق )) هتعرفوا مين هو الفاعل وهتعرفوا ليه حسنى فضَل يقع (( هو اللى فضل محدش غصبه )) بعد 18 يوم بس من اﻻعتصام .

الفاتحة على روح شهدائنا

أفيقوا يرحمكم الله (( ولكم فى القصاص حياة يا أولى اﻻلباب ))

حتى اﻻن كلامى انتهى وخلاص اليوم خلص منعرفش بكره المجلس مجهزلنا ايه فى الفلانتين

-----------------------------------------------------

شقه للبيع - شقه للبيع فى المعادى - شقة للبيع - شقة للبيع فى المعادى - شقه للايجار - شقه للايجار فى المعادى - شقة للايجار فى المعادى - شقة للايجار